( ابتدى الحب)
ابتدي يالحب ورسم في سما هالليل قلبين
اكتـب بـشــما الاول واكتب الثاني لعيسى
انشالله تعيبكم قصتي وحتى لو هي هب حلوة جاملوني وقولو حلوة ...
ببدأ بشخصيات القصة ...
اليدة أكبر راس فالعايلة حرمه كبيرة فالسن وعلى نياتها وأسمها(مريم) وعندها 3 ولدين وبنت .. وهي عايشه عند ولدها البجر(راشد) بو زايد وهو واحد ماشالله عنده شركات وبيزات ومقتدر وزوجته متوفية الله يرحمها وله منها 3 اولاد وبنتين وهم البجر الجبير(زايد)وعمره 28سنه ويشتغل عند ابوه ومزوج من بنت خالته موزة وهي اصغر عنه بخمس سنوات وله منها بنت وولد (نوف)وعمرها 6سنوات و(نايف)عمره سنتين ونص وعقبه ايي عبيد خريج جامعه وعمره 20سنه وبعده مايفكر بالشغل عايش حياته وألي اصغر منه خليفة وعمره 18سنه ويدرس ثنويه عامه وعقبه العنود وعمرها 16سنه بثاني ثنوي آخر العنقود دلوعة ابوها الريم وعمرها 5 سنوات ...
بو شهاب(سالم) وهو عقب بو زايد وهو واحد مقتدر وعنده عقده من حرف الشين ومسمي كل عياله بحرف الشين وحتى حرمته اسمها(شمسه)الله يطول بعمرها وله منها 3بنات وولدين وهم البجر(شهاب)وعمره 20سنه وهو يدرس برع في بريطانيا ومن عقبه شادي وعمره 18سنه وهو ربيع خليفة ودلوعة البنات شما وعمرها 16سنه ومن عقبها الصغيرونه شوق وعمرها 10سنوات وهي بصف رابع وماننسا الشيطانه شهد وعمرها 6سنوات ...
واخر العنقود أم سعيد(فطيم) ولها من ريلها المرحوم(ناصر) 3اولاد وبنت واكبرهم (سعيد)وعمره 29سنه ويشتغل عند عمه وهو متزوج من بنته(عويش) وهي يحليلها توها حامل بالشهر الثالث وهو ألي شايل المسوؤلية بعد وفاة ابوه ومن عقبه أيي حمدان وعمره 24سنه بطالي مايشتغل وما ننسى الجنتل عيسى وعمره 18سنه شرات خليفه وشادي ومن عقبه دلوعة البيت ودحانت امها سلامه وعمرها16سنه ..
....................................
جي تعرفتو على العايلة الكريمة كلها وما بطول عليكم وببدأ بأحداث القصة ...
....................................
في بيت بو زايد كان الكل متيمع لانهم متعودين كل جمعة بعد الصلاة يسيرون يتغدون عند يدتهم ويتيلسون عندها لين المغرب أو العشاء ...
فالصالة كان الكل متيمع الحريم يالسات ع صوب والبنات الصوب الثاني واليهال يلعبون ...
ام سعيد:امـــايه شخبارج؟؟
يدوة:الحمدالله بخير
ام سعيد:انتي الحين اهون عن قبل؟؟
يدوة:الحمدالله بنيتي انتي شخبارج وشخبار عيالج عساكم مرتاحين
ام سعيد:الحمدالله كلنا بخير المهم انتي تكونين بخير وبصحة وعافية
يدوة:الله يعافيج من الشر
وتمن كل وحدة تنشد عن اخبار الثانية ومن سالفه لسالفه
عويش وهي متمللة:سوالفهن مشالله ماتخلص صدق يوم قالو سوالف العيايز ما تنمل
موزة:هههههههه تعودي حبيبتي ..والله يلستهن حلوه
عويش:هي والله
العنود:أي حلوه واي خرابيط ألا قولي مملة
شما وسلامه:هي والله صدقج
موزة:عيل وين باقي الشعب
سلامه:ريمو وشوق وشهد ونوف ونواف يلعبون
موزة: اهـــاا احسن لهم ..جان تسمع صوت صياح:منو ألأي يصيح؟؟
جان اتي ريمو ركض:خالوة خالوة ثوق ضربت نايف
نايف:اوااااااااااه مــــــامــــــــا
موزة:بس خلاص حبيبي منو كحاك
نايف وهو يصيح: ثوك ثوتني كح
نايف:اآيـــــسه ..قصده(خايسه)
موزة:حق شو تضربين ولدي
شوق:ليث مايخليني ألعب احثن يثتاهل صياح واحد
موزة:يالله بس خلاص سيرو ألعبو
عويش:الله يعيني جان يعالي جي بيطلعون ..والله حاله
موزة:الله يعينج هههههههه
العنود:عقبالي انشالله
شما:ليش جي وايد مستعيلة ع رزقج
العنود:بس خلاص طفرت
شما:الله يعينه تعيس الحظ الي بياخذج يالدبة
العنود:تعس حظج يالخايسه
سلامه:احيدها نظيفة كل يوم تسبح
العنود:هههههه سخيفه مايضحك
جان يدشون الشباب توهم رادين من المسيد ..
بوزايد: شخباركن بنات ؟؟
قامن سلمن على عمهن وباسن راسه :الحمدالله بخير دامك بخير انت شخبارك؟؟
بوزايد:انا بخير الحمدالله يعلكن الخير ..عيل وين يدتكن وعمتكن!
العنود: في الصالة الثانية
الشباب:ونحن مالنا رب مايسلمون علينا
البنات من دون نفس:شخباركم؟
الشباب:طاع بعد رافعات خشمهن مادري ع شو
البنات:احمدو ربكم سلمنا عليكم
الشباب:مالت على هالشيف ...سارو عنهن الميلس اما عيسى وخليفة وشادي تمو متيلسين عندهن تعرفون بعد حركات شباب...
شمو تساسر سلامه:سلوم شو رايج نخسس في الثلاثي المرح
سلامه:ليش شو بتسوين؟؟
شما:شوفي انتي بس مشيني بالكلام
سلامه وهي مستغربة:اوكيك يا كيك
شما بدلع: حبيبي سلوم قومي نسير نيلس مكان ثاني
الكل الي كان يالس هناك :ليش هب عايبتنج يلستنا !
شما بدلع:لا بس المكان صار ماينطاق بوجود ناس سار زحمة ماروم ماروم خنقه
كانت تقصد الشباب بكلامها
عيسى:شو قصدج
شما بخقه: الي على راسه بطحه يحسس عليها
سلامه:ههههههههاي قوية
العنود:حلوة منج يا بنت الخال
عيسى يفلع سلامه بالمخدة:ما عليه دواج عقب فالبيت
سلامه: ااااااي .. اميه خرعيتني
العنود:عن سلومي كله الا سلومي حدك عاد
سلامه:فديتج والله
شما:وانا مالي رب
عيسى:فديتج انا
شما:اع اع وع مابي تفدي منك مشكور
عيسى وهو مقيض من الحركة:احمدي ربج حد تفداج
خليفة:وووووويك قفطة
شما:حمدالله والشكر
شادي وهو يضحك:ألعبي غيرها يا حلو
شما:تحلن ضلوعك انشالله
العنود بستغراب: انتي تسبين ولا تتغزلين الحين
الكل يضحك: ههههههههه ههههههههههه
شما وهي قافطة: الاثنين
وعيسى كان وايد مقيض عليها وتم يطالعها بنظرة وخاطره ينش يلفها بكف بس ماتهون عليه لانه كان معجب فيها ويحبها...
((شما بنت دلوعة ووايد خقاقه وشايفه عمرها وهي من النوع المرح وماشالله عليها طالعه حلوة شرات امها شعرها بني طويل وعيونها عسليات ومايل للبني الغامج وهي حنطاويه ..)) ((اما عيسى وايد شايف عمره مخلي عمره جنتل مان و هو وايد حبوب ومرح وجماله حلو... حنطاوي البشرة ومربي شعره وطوله جذاب بالمختصر شكله عذاب..)) جان اتي الريم وتقولهم:تعالو كلكم بابا يقول غدا
وبعد الغدا ألي سار يرقد وألي ظهر ألي تم بالصالة يطالع تلفزيون يعني كل واحد فيهم ألتها بشي وعيسى كان يطالع ويبحلق في شما وهي غافلة عنه ((شو هالحلاة شو هالزين تخبلين ..كل شي فيج حلو فديتج وفديت دلعج)) صدت فجاة صوبه ولقته يطالعها جان يصد الصوب الثاني وفي خاطرها((ها في شو يبحلق جي عنبوه بياكلني بعيونه .. صح انه حلو وينحب بسرعه بس ما تـخيل هالخقاق انه يكون شي في حياتي )) ومر الوقت دون ما يحسون .. وجي عالمغرب الكل بدا ينسحب ويرد بيته.
سلامه:عمي خلي عنود اتي بيتنا
بوزايد:انزين باجر مدارس حبيبتي
سلامه:عادي عادي بنغيب .. حتى شماني بتي
بوزايدكخلاص روحي بس هب كل يوم العيد
سلامه:عادي عمي اتعود من الحين ههههههه
بوزايد:هههههه ..شما بنيتي قلتي حق امج
شما:هي عمي قلتلها وقالتلي عادي اسير
بوزايد:الله يحفظكن
سلامه:الله حبايبي بيباتون عندنا ... واحسن بنفتك من المدرسة
شماو العنود:هيه والله بنفتك
شما: سهرتنا هالليلة خلوها صباحي ههههه
العنود: تارااا .. تارااا
وسارو سلمو على عمهم ويدتهم وكل واحد فيهم رد بيته اما الشباب سارو يتحوطون والبنات سارن عند سلامه ...
.............................
بوزايد: يا محلا اليمعه
يدوة: هيه والله .. الله يحفظكم ويخليكم لعيالكم
بوزايد:آمين
يدوة:اميه موزة تعالي وديني غرفتي برقد
موزة:انشالله يدوة يالله عطيني ايدج ...شوي شوي
يدوة:بسم الله .... ودتها غرفتها علشان ترقد ومن عقبها الكل اعلن انسحابه وسار رقد .. ونفس الشي في بيت بوشهاب الكل رقد اما في بيت ام سعيد الكل رقد ما عدا 3 gerils شالات الدنيا فوق راسهن يالسات بالصالة يسمعن اغاني..
شما:حطي نجوم الخليج
العنود:لا اول شي حطي حواس
سلامه:وحده وحده سندرتن براسي
شما تبوسها على راسها:سلامت راسج بس الحين حطي نجوم الخليج
سلامه:من عيوني ههههههه
شما:تسلملي عيونج
العنود:الله الله ع التقردين
شما: جب ههههههههه
سلامه:هههههههه جان تحط لهم نجوم الخليج وكانو حاطين فيها اغنية غرشوب لفرقة المزيود الحربية..
شما:الله غرشوب طولي عليها فديتج خليني أيول شوي
سلامه:ههههههه (غرشوب رعبوب والخصر ميهود والعود ميال)شما تمت تيول وفجت شعرها وتمت تنعش ..
العنود:عاشو عاشو
سلامه:يابس يابس ....ايوا ايوا عاشت اليويلة خخخخ
جان يدش عليهم عيسى وعلى ربشتهن وحشرتهن ماحسن فيه وياويل حال عيسو ذاك الوقت حبيبته يالسه تيول وفاجه شعرها بعد اسميه كان شكلها عذاب لانه أول مرة يشوفها جي وبهاي الحالة ..
فجأة لاحظت عليه سلامه جان تصخ وعنود أول ماشفته قصرت عالصوت ولا جأنها مسوية شي وشما خبر خير وبستغراب:شو فيكن ؟؟ ليش قصرتي؟؟
عيسى:احم احم (وهو مبقق عينه عليها)
شما وهي متقفطه:امبيه جان تلبس شيلتها ونزلت عينها الارض وما رامت ترفع عينها من الفشلة .. عيسى:تصبحون على خير
شما وهي محرجه عليهن: يالخايسات ليش ما قلتن لي اسميكن مافيكن خير
والعنود ماسكه ضحكتها وماقدرت جان تضحك فويها وسلامه نقعت من الضحك
شما:هي اضحكن اضحكن جي زين الحين شافني مالت عليكن
وتمن يضحكن ويضحكن وهي مقيضة عليهن خاطرها تقوم وصفعهن جان تصعد عنهن فوق سارت غرفت سلامه عسبت ترقد لانها كانت وايد مفتشلة من عيسى وفي خاطرها (شو هالفشيلة شو الحين بيقول عني.. وهو ماعرف يقول انه موجود لا احم ولا دستور..انا وايد قاصه ع عمري في بيتهم واباهم يستاذنون بعد والله حاله)اما عيسى (وابوييه عليها بتذبحني هالبنت من حلاتها احبها..احبها واموت فيها) وهي صاعده كل واحد يفكر في الثاني وبدون قصد تدعمه:انت ..اي ماتشوف شو عمي
عيسى وهو يضحك:انتي الي داعمتني وتقولين لي ماتشوف
شما:اوكي اوكي سوري والحين خوز عن طريقي
عيسى:بل بل بتاكلني بقشوري وخاز عنها
شما بعصبية:والله اووووف (طالعها بنظرة وسار عنها)
المهم سارن يرقدن وجي عالفجر نشت شما تصلي ونزلت تشرب ماي وهي فالمطبخ جان يدش عليها عيسى وكان يرمس فالفون:اقول عقب ارمسج يالله باي
شما:انت وراي وين مااسير شو تبا!
عيسى:ياي مطبخنا حرام الواحد ياخذ راحته في بيته بعد
شما وهي تقلدة:ياي مطبخنا حرام الواحد ياخذ راحته فبيته بعد من زينك الحين
عيسى وهو محرج:انتي شو مشكلتج يوم برمسج رمسيني عدل فاهمه
شما:شوي شوي ع عمرك لا يطيح نصك
عيسى بعصبية:انتي ع شو شايفه عمرج الواحد يغلط يوم يحطج في باله أو يحبج هدها وسار عنها ..
والدموع في عينها:منو ها علشان يهزبني جي وفي خاطرها(والله احبك) وسارت الغرفة وهي تصيح ..سار غرفته ورقع الباب زين مانكسر من القهر ورقد..
وجي عالساعه 9الصبح كان الكل راقد وعيسى فالمطبخ يالس يسويله توستي وكان يالس بفالينه و وزار جان ادش عليه شما لانه ماياها رقاد من الموقف الي صار وأول مادشت وشافته جي وماكان عبالها انه بتحصله ناش استحت وظهرت..
جان يزقرها:شمو تعالي عادي دشي
شما في خاطرها شو هالصدف كل شوي الاقيه جدامي:لا خلاص عقب بيي
عيسى:اقولج تعالي
شما:انزين ..جان ادش المطبخ :صباح الخير
عيسى:صباح النور والسرور
ماعبرته وفتحت الثلاجه وطلعت لها كوب عصير وهي بتظهر جان يزقرها:شما
شما:هــــلا
عيسى في خاطره لباج قلبي:انا آسف
شما اطالعه بنص عين:على شو
عيسى:لاني رمستج امس بطريقة هب حلوة
شما:لا عادي سالفه وانتهت والمفروض انا الي اعتذر لاني عاملتك بهالطريقة
عيسى:انزين تعالي ايلسي ابا اقولج شي
شما:آمر خير شو عندك
غريبة أول مرة ترمسني بدون ماتضارب:ابا اقولج الي في خاطري
شما بستغراب:بصفتي شو؟؟
عيسى:بصفتج بنت خالتي
شما:اهــــــاا كلي آذان صاغية
عيسى:يمكن الي بتسمعينه غريب شوي
شما:انزين قوووول
عيسى:انا احبج وخاطري تبادليني نفس الشعور
شما بدلع:اصلا الكل يحبني
عيسى:ها هب وقته تدلعين
شما:انا جي طبعي
عيسى:انزين ما قلتيلي انتي تحبيني
شما:اجذب اذا قتلك لأ
عيسى وهو فرحان:عيل ليش جي اتعامليني شوفي معاملتج ويا الكل ومعاملتج وياي
شما:ما اتخيل ان في يوم احب واحد يعرف من وراي عشرة
عيسى وهو مقيض: شو قصدج انا راعي بنات
شما:انا ماقلت بس انا اعرفك مايمر عليك شهرين والا انت متعرف على وحده يعني تباني احبك واتعلق فيك وعقب تهدني شو هي الدنيا مصخره..
عيسى:والله اذا صرتي حبيبتي لا اتغير واهد كل شي وكل ألي كنت اسويه قبل
شما:الواحد يوم يتغير بيتغير لنفسه هب لغيره ..اول شي غير تصرفاتك عقب يصير خير ... عيسى:انشالله
شما:تبي شي ثاني انا سايرة تــــــشاووو show
عيسى:خلاص سيري..(والله لاتغير عشانج واسوي المستحيل عشان تكونين حبيبتي والله لا اخليج تتعذبين شرات ماتعذبيني الحين)
وجان ترد مرة ثانية:سلملي على البنت الي كنت ترمسها الفير اوكي
عيسى وهو يضحك:ههههههه انشالله يوصل سلامج (فديت روحج اونج تغارين علي)
ياترى عيسى بيتغير ولا بيتم نفس ماهو عليه..شما بترضى عليه وبتحبه ولابتم على اسلوبها انشالله بتعرفون التفاصيل فالبارت الثاني...
ببـــــــاي
الرئيسية 
أحدث الصور 
التسجيل 
دخول 
